ठूलो बजेटमा निर्माण भएको पौराणिक ड्रामा फिल्म ‘नागबन्धम’ नेपालमा प्रदर्शनमा आएको छ । क्यापिटल वर्ल्डमार्फत नेपाल भित्रिएको ‘लार्जर द्यान लाइफ’ अनुभव दिने यो फिल्म शनिबार साँझदेखि देशभर प्रदर्शन भइरहेको छ । फिल्मले हिमालयको रहस्यमय गहिराइमा लुकेको भगवान् अनन्त पद्मनाभस्वामीको अमूल्य खजाना र श्रीरङ्गापुरम् मन्दिरमा रहेको ऐतिहासिक ‘ब्रह्म कमल’ (सुनौलो फूल) को रहस्यमय संसारलाई भव्य रूपमा प्रस्तुत गरेको छ ।

अभिषेक नामाको लेखन तथा निर्देशन रहेको फिल्ममा मुख्य पात्र रुद्र (विराट कर्ण) लाई भगवान् महादेव (शिव) को शक्तिशाली तथा उग्र स्वरूपका रूपमा चित्रण गरिएको छ । उनी आफ्नो समुदाय र धार्मिक सम्पदालाई दुष्ट शक्तिबाट जोगाउन जीवन नै दाउमा लगाएर संघर्षरत देखिन्छन् । फिल्ममा विराट कर्णसँगै नभा नतेश र ऐश्वर्या मेनन मुख्य भूमिकामा छन् । साथै, महेश माञ्जरेकर, जगपति बाबु, मुरली शर्मा र ऋषभ साहनीको पनि महत्त्वपूर्ण अभिनय रहेको छ । ‘केजीएफ’बाट ‘गरुडा’ पात्रका कारण चर्चामा आएका रामचन्द्र राजुले फिल्ममा खलनायकको भूमिका निर्वाह गरेका छन् ।

एनआईके स्टुडियो र अभिषेक पिक्चर्सको ब्यानरमा किशोर अन्नपुरेड्डी र निशिता नागिरेड्डीले निर्माण गरेको फिल्मले पौराणिक कथालाई सामाजिक, राजनीतिक तथा साम्प्रदायिक विषयसँग जोडेर प्रस्तुत गरेको छ । निर्माण पक्षका अनुसार हिन्दु धर्मप्रति आस्था राख्ने दर्शकका लागि यो फिल्म विशेष आकर्षण बन्ने अपेक्षा गरिएको छ । निर्देशक अभिषेक नामाले ‘नागबन्धम’मा धर्म, आस्था र शक्तिबीचको द्वन्द्वलाई केन्द्रमा राख्दै कथा अघि बढाएका छन् ।

फिल्मको सुरुआत मानिसको अमर बन्ने चाहना र निरंकुश शक्तिप्रतिको लोभबाट हुन्छ। मुख्य खलपात्र अब्दाली र बैरागी ‘ब्रह्म कमल’ प्राप्त गरी परम शक्ति हासिल गर्ने योजनामा हुन्छन् । उनीहरूको योजनालाई विफल पार्दै पवित्र सम्पदाको रक्षा गर्न रुद्र आफ्नो जीवन नै समर्पित गर्छ । सन् १७५६ को फ्ल्यासब्याकमार्फत धार्मिक समुदायमाथि भएको हिंसाको घटनाले रुद्रको संघर्षलाई अझ गहिरो अर्थ दिएको छ ।

सुरुआतमै पौराणिक तथा धार्मिक पृष्ठभूमिलाई प्रभावकारी रूपमा स्थापित गरेको फिल्म श्रीरङ्गापुरम् मन्दिरसँग जोडिएका रहस्यहरू खुल्दै जाँदा थप रोचक बन्दै जान्छ । त्यसपछि कथा एक्सन र एड्भेन्चरतर्फ मोडिन्छ, जहाँ रुद्रले सर्प, चील र गोहीसँग जोखिमपूर्ण संघर्ष गर्दै आफ्नो लक्ष्यतर्फ अघि बढ्छ। पार्वतीको परिवारसँग सम्बन्धित कथा र १८औँ शताब्दीको नरसंहारलाई भावनात्मक ढङ्गले प्रस्तुत गरिएको छ ।

फिल्मको सबैभन्दा बलियो पक्ष यसको भिजुअल प्रस्तुति हो । भव्य सेट, उत्कृष्ट सिनेमाटोग्राफी, प्रभावशाली एक्सन दृश्य तथा पौराणिक वातावरण सिर्जनामा निर्माण टिमले गरेको मेहनत पर्दामा स्पष्ट देखिन्छ । यही पक्षले ‘नागबन्धम’लाई दर्शकका लागि फरक अनुभव दिने पौराणिक एक्सन–ड्रामा फिल्मका रूपमा स्थापित गरेको छ ।