नेपाली सांगीतिक क्षेत्रमा सक्रिय गायक तथा सर्जक बियोन्डको नयाँ गीत ‘झिम झिम’ सार्वजनिक गरिएको छ । शनिबार काठमाडौंमा आयोजित विशेष कार्यक्रमबीच एफएसडी फिल्मस्को प्रस्तुतिमा तयार गरिएको गीतको भिडियो औपचारिक रूपमा रिलिज गरिएको हो । सार्वजनिक भएसँगै गीतले दर्शक तथा संगीतप्रेमीमाझ सकारात्मक प्रतिक्रिया पाउन थालेको छ । आधुनिक स्वाद र रोमान्टिक भावनाको समिश्रण रहेको गीतले प्रेम, अनुभूति र समकालीन युवापुस्ताको भावना प्रस्तुत गर्ने प्रयास गरेको निर्माण पक्षले जनाएको छ ।

गीतमा शब्द स्वयं बियोन्डले लेखेका हुन् भने संगीत ब्रिजेश श्रेष्ठको रहेको छ । गीतको भिडियो निर्देशक पी माधवले निर्देशन गरेका हुन् । भिडियोमा आकर्षक दृश्य संयोजन र कलात्मक प्रस्तुति देख्न सकिन्छ । कोरियोग्राफर दिपिका तामाङको कोरियोग्राफीले भिडियोलाई थप जीवन्त बनाएको छ । भिडियोमा बियोन्ड स्वयं र मोडल निशा श्रेष्ठको अभिनय देख्न सकिन्छ । उनीहरूको अभिनय र अभिव्यक्तिले गीतको भावलाई प्रभावकारी रूपमा प्रस्तुत गरेको दर्शकहरूको प्रतिक्रिया छ ।

प्राविधिक पक्षमा पनि भिडियोलाई आकर्षक बनाइएको छ । भिडियोका डिओपी विवेक मगर हुन् भने छायांकन योन्जनले गरेका छन् । भिडियो सम्पादन सोवित मगरले गरेका हुन् । दृश्य संयोजन, रंग संयोजन तथा सम्पादन शैलीले भिडियोलाई आधुनिक र स्तरीय बनाएको छ । गीत सार्वजनिक कार्यक्रममा विभिन्न कला, संगीत तथा सञ्चार क्षेत्रका व्यक्तित्वहरूको उपस्थिति रहेको थियो । कार्यक्रममा पुनम अग्रवालको सभापतित्व रहेको थियो भने प्रमुख अतिथिका रूपमा हाकिम उपस्थित थिए ।

कार्यक्रममा वक्ताहरूले नेपाली संगीत क्षेत्रमा नयाँ पुस्ताले सिर्जनात्मक र गुणस्तरीय काम गरिरहेको उल्लेख गर्दै ‘झिम झिम’ गीतले पनि दर्शकमाझ राम्रो स्थान बनाउने विश्वास व्यक्त गरेका थिए । कार्यक्रममा बोल्दै बियोन्डले नेपाली संगीत क्षेत्रमा फरक स्वादका सिर्जना प्रस्तुत गर्ने प्रयास निरन्तर जारी रहने बताए । उनले दर्शक तथा स्रोताबाट प्राप्त साथ र प्रतिक्रियाले आफूलाई थप उत्साहित बनाएको उल्लेख गर्दै आगामी दिनमा पनि नयाँ सिर्जनासहित उपस्थित हुने बताए ।

सार्वजनिक ‘झिम झिम’ गीत तथा भिडियो अहिले विभिन्न डिजिटल प्लेटफर्ममार्फत हेर्न र सुन्न सकिनेछ ।