नेपाली फिल्म क्षेत्रमा अनुभवी निर्देशक नीर शाह ले नयाँ फिल्म ‘कमला मिस’मार्फत निर्देशनमा पुनः सशक्त पुनरागमन गरेका छन् । आगामी साउन २२ गतेबाट देशव्यापी प्रदर्शनमा आउने तयारीमा रहेको फिल्मको फस्टलुक पोस्टर सार्वजनिक भएसँगै दर्शकमाझ उत्सुकता बढेको छ । सार्वजनिक पोस्टरमा मुख्य अभिनेत्री बासना तिमिल्सिनालाई गहिरो मनोवैज्ञानिक भावभंगिमामा प्रस्तुत गरिएको छ ।

पोस्टरले फिल्मको कथावस्तु रहस्यमय, संवेदनशील र मनोवैज्ञानिक पाटोमा केन्द्रित रहेको संकेत गर्छ । निर्माण पक्षका अनुसार फिल्मको अफिसियल टिजर यही बिहीबार सार्वजनिक गरिनेछ । मनोवैज्ञानिक कथामा आधारित फिल्म ‘कमला मिस’मा निर्देशक नीर शाह स्वयंको अभिनयसमेत रहेको छ । साथै फिल्ममा रमेश बुढाथोकी, बासना तिमिल्सिना, शिवम सराफ क्षेत्री, आरभ दाहाल, भावना मगर, सुशान्त कुमार श्रेष्ठ, जयन्त रेग्मी, सुरेश थापा, राजन केसी र संजय खतिवडालगायत कलाकारहरूको अभिनय रहेको छ ।

विजय मल्ल स्मृति प्रतिष्ठानका लागि उमा मल्लले निर्माण गरेको फिल्मका कार्यकारी निर्माता उमेश मल्ल र चैतन्य प्रधान हुन् । विजय मल्लको कथामा आधारित फिल्मको पटकथा तथा संवाद नीर शाह र प्रजल दुलालले संयुक्त रूपमा तयार पारेका हुन् । फिल्ममा शिवराम श्रेष्ठको छायांकन, युग भुसालको संगीत तथा रामजी लामिछानेको कोरियोग्राफी रहेको छ ।

निर्माण व्यवस्थापन भोला सुवेदीले सम्हालेका छन् भने मुख्य सहायक निर्देशक सगर बोहरा रहेका छन् । करिब एक दशकपछि निर्देशनमा फर्किएका नीर शाहले यसअघि ‘वासुदेव’, ‘पच्चीस वसन्त’, ‘राजमती’, ‘वसन्ती’, ‘मसान’ र ‘सेतोबाघ’ जस्ता चर्चित फिल्म निर्देशन गरिसकेका छन् । त्यसैले ‘कमला मिस’लाई उनको अनुभव र सिर्जनशीलताको नयाँ अध्यायको रूपमा हेरिएको छ ।

एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले वितरण गर्ने यस फिल्मले नेपाली दर्शकमाझ फरक स्वादको मनोवैज्ञानिक कथा प्रस्तुत गर्ने निर्माण टिमको विश्वास छ ।