निर्देशक टंक बुढाथोकीको निर्देशनमा बन्न लागेको फिल्म ‘मन विनाको धन २’मा अभिनेता महेश त्रिपाठी अनुबन्धित भएका छन् । निर्माण पक्षले महेशसँग औपचारिक कागजी सम्झौता गरिसकेको जनाएको छ । फिल्ममा महेशको भूमिका कस्तो रहने भन्नेबारे निर्माण टिमले खुलाएको छैन । यद्यपि, फिल्म पारिवारिक तथा सामाजिक कथावस्तुमा आधारित हुने बताइएको छ ।

यसअघि नै अभिनेत्री पूजा शर्मा फिल्मका लागि अनुबन्धित भइसकेकी छन् । पूजा र महेशको जोडी पर्दामा देखिने वा नदेखिने विषयमा भने निर्माण पक्षले केही खुलाएको छैन । ‘मन विनाको धन २’को पटकथा तथा संवाद शिवम् अधिकारीले लेखिरहेका छन् । फिल्मको कथा र संगीत निर्देशक टंक बुढाथोकी स्वयंको रहनेछ । अहिले फिल्मको प्रि–प्रोडक्सनको काम तीव्र रूपमा भइरहेको निर्माण पक्षले जनाएको छ ।

निर्देशक बुढाथोकीले फिल्ममा दर्शकमाझ लोकप्रिय र स्थापित कलाकारहरूलाई समेट्ने योजना रहेको बताएका छन् । उनका अनुसार कलाकार छनोटको प्रक्रिया अझै जारी छ । टंक बुढाथोकी फिल्म्सको ब्यानरमा निर्माण हुने फिल्मकी निर्माता विष्णु माया मैनाली हुन् ।

पहिलो भाग ‘मन विनाको धन’ले घरेलु बक्सअफिसमा सफलता हासिल गरेपछि यसको सिक्वेलप्रति दर्शकमाझ उत्साह देखिएको छ ।