यही शुक्रबारदेखि प्रदर्शनमा आउन लागेको फिल्म ‘गौँथली’को अग्रिम टिकट बुकिङ खुला भएको छ । प्रदर्शन मिति नजिकिएसँगै काठमाडौं उपत्यका तथा मोफसलका अधिकांश मल्टिप्लेक्स हलहरूले मंगलबारदेखि नै शो सार्वजनिक गर्दै अग्रिम बुकिङ सुरु गरेका हुन् । देशकै ठूलो मल्टिप्लेक्स चेन क्यूएफएक्सले शुक्रबारका लागि शो सार्वजनिक गरिसकेको छ । त्यसैगरी आइएनआई, वान सिनेमाजलगायतका प्रमुख मल्टिप्लेक्सहरूले पनि फिल्मको अग्रिम टिकट बुकिङ खुला गरेका छन् ।
फिल्मका वितरक करण श्रेष्ठ ‘क्रेजी’का अनुसार देशभरका अधिकांश हलमा बुकिङ खुल्ने क्रम जारी छ । उनले बुधबारसम्म देशभरबाट २०० भन्दा बढी शो प्राप्त हुने विश्वास व्यक्त गरेका छन् । उनले भने, “शो खुल्ने क्रम जारी छ। अहिले नै यकिन संख्या भन्न सकिँदैन, तर भोलिसम्म देशभरबाट २०० भन्दा बढी शो प्राप्त हुने अपेक्षा गरेका छौं ।”
प्रिमियर प्रदर्शनमा उत्कृष्ट प्रतिक्रिया प्राप्त गरेको ‘गौँथली’ले प्रदर्शनअघि नै राम्रो चर्चा बटुलिरहेको छ । कथावस्तु, कलाकारहरूको अभिनय र प्रस्तुतीकरणको खुलेर प्रशंसा भएपछि निर्माण टिमले त्यसको सकारात्मक प्रभाव बक्स अफिसमा पनि पर्ने विश्वास लिएको छ । डा. कपिल रिजालको निर्देशनमा बनेको फिल्ममा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सन्जोग रसाइली, सीतादेवी तिमिल्सिना, लक्ष्मीनाथ तिमिल्सिना र राजेन्द्र नेपालीको अभिनय रहेको छ ।
बाल कलाकारका रूपमा अंशु ओली र प्रिन्स नेपालीले अभिनय गरेका छन् । भोला रिजाल प्रोडक्सन र सुमन गिरी प्रोडक्सनको प्रस्तुतिमा निर्माण भएको फिल्मका कार्यकारी निर्माता सरला रिजाल हुन् । निर्माता सुमन गिरी र डा. कपिल रिजाल रहेका छन् भने इन्दु गिरी, मनिष रिजाल, प्रलय रिजाल र जीवन ओली सह–निर्माताका रूपमा रहेका छन् ।
डा. भोला रिजालको कथामा आधारित फिल्मको पटकथा तथा संवाद निर्देशक डा. कपिल रिजाल, निश्चल कुँवर, निरज नेपाल र गिरिराज घिमिरेले संयुक्त रूपमा लेखेका हुन् । फिल्ममा हरि हुमागाईंको छायांकन, मिलन श्रेष्ठको सम्पादन रहेको छ । रिच इन्टरटेनमेन्ट, एप्पल इन्टरटेनमेन्ट र एफ.डी. कम्पनीले वितरण गर्ने ‘गौँथली’को डिजिटल पार्टनर ओएसआर डिजिटल रहेको छ ।
