वास्तविक जीवनका घटनाबाट प्रेरित भएर निर्माण गरिएको नेपाली फिल्म ‘हली’ नेपालमा प्रदर्शन हुनुअघि नै साइप्रसमा ‘सोल्ड आउट’ भएको छ । आगामी साउन २२ गतेदेखि देशभर प्रदर्शनमा आउने तयारीमा रहेको फिल्मको साइप्रस प्रदर्शन अधिकार शतप्रतिशत बिक्री भइसकेको निर्माताद्वय पूजा गुरुङ र जश्मिन श्रेष्ठले जानकारी दिएका छन् । शुभ चिरायु फिल्म्स र जापुरा फिल्म्स प्रोडक्सनको सहकार्यमा निर्माण भएको फिल्मको साइप्रस प्रदर्शन अधिकार त्यहाँका वितरकले खरिद गरिसकेका छन् ।

निर्माण पक्षका अनुसार अन्य विभिन्न देशमा पनि प्रदर्शन अधिकार बिक्रीका लागि तीव्र रूपमा छलफल भइरहेको छ। सम्बन्धित देशहरूको प्रदर्शन टुंगो लागेपछि आधिकारिक जानकारी सार्वजनिक गरिने जनाइएको छ । प्रमोसनल गीत र आकर्षक पोस्टर सार्वजनिक भएसँगै ‘हली’ चर्चामा रहेको छ । गत वर्ष व्यावसायिक रूपमा सफल फिल्म ‘मोहर’ निर्देशन गरेका निर्देशक तथा लेखक ओम प्रतीकको निर्देशनमा बनेको फिल्मले समाज र देशमा सकारात्मक परिवर्तन ल्याउन एउटै ‘हली’ पनि पर्याप्त हुन्छ भन्ने सशक्त सन्देश बोकेको छ। निर्माण टिमले अघिल्लो फिल्मझैँ यसपटक पनि दर्शकबाट राम्रो साथ पाउने विश्वास व्यक्त गरेको छ ।

व्यवसायीद्वय पूजा गुरुङ र जश्मिन श्रेष्ठको लगानी रहेको फिल्ममा प्रमोद दीप, सुजता थापा, सरोज खनाल, अरुणा कार्की, अर्जुन गुरुङ, विद्या कार्की, नविन श्रेष्ठ, कञ्चन दुलाल, कमल गाउँले र विशाल पहाडीको मुख्य भूमिका रहेको छ। निर्देशक ओम प्रतीक पनि विशेष भूमिकामा देखिनेछन् । फिल्ममा समावेश गरिएको विशेष प्रमोशनल गीतमा दीपाश्री निरौला, किरण केसी, दिलीप रायमाझी, प्रियंका कार्की र पूजा शर्माको आकर्षक प्रस्तुति रहेको छ ।

उक्त गीतको कोरियोग्राफी कविराज गहतराजले गरेका हुन् भने अन्य गीतहरूमा ओम प्रतीक र कविराज गहतराजको संयुक्त नृत्य निर्देशन रहेको छ । संगीत पक्षमा शम्भुजित बास्कोटा, बाबुल गिरी र कृष्ण भारद्वाजको संगीत रहेको फिल्मको मुख्य गीतमा जश्मिन श्रेष्ठको शब्द, बाबुल गिरीको संगीत तथा बाबुल गिरी र शान्तिश्री परियारको स्वर सुन्न सकिन्छ ।

फिल्मका कार्यकारी निर्माता अर्जुन भुसाल, सह–निर्मात्री नम्रता भण्डारी, लाइन प्रोड्युसर लक्ष्मण कर्माचार्य तथा मुख्य सहायक निर्देशक जीवननाथ गौतम हुन् । राहुल राईको छायांकन रहेको फिल्मलाई रामप्रसाद चौधरी र विपिन मल्लले सम्पादन गरेका छन् भने द्वन्द्व निर्देशन कुमार महर्जनको रहेको छ । नेसनल सिने ग्रुप प्रालिले वितरण गर्ने ‘हली’को डिजिटल पार्टनर ओएसआर डिजिटल रहेको छ । देशभित्र र विदेशमा बढ्दो चर्चा तथा अन्तर्राष्ट्रिय बजारमा प्रदर्शन अधिकार बिक्रीसँगै फिल्मले प्रदर्शनपछि राम्रो व्यापार गर्ने अपेक्षा निर्माण पक्षले गरेको छ ।