अभिनेत्री तथा निर्देशक नीता ढुङ्गानाको निर्देशनमा बनेको बहुप्रतीक्षित फिल्म ‘पार्वती’को चर्चित गीत ‘नौतुना रेलैमा’ यतिबेला सामाजिक सञ्जालमा भाइरल बनेको छ । ओएसआर डिजिटलको युट्युब च्यानलमार्फत सार्वजनिक गरिएको गीतमा हालसम्म ३० हजार २०० भन्दा बढी टिकटक भिडियो निर्माण भइसकेका छन् । टिकटकसँगै फेसबुक, युट्युबलगायत विभिन्न डिजिटल प्लेटफर्ममा पनि गीतले व्यापक लोकप्रियता हासिल गरिरहेको छ ।

गीतको लोकप्रियतालाई थप उत्साहजनक बनाउन निर्माण टिमले केही समयअघि ‘नौतुना रेलैमा टिकटक प्रतियोगिता’ समेत घोषणा गरेको थियो। प्रतियोगितामा सहभागी हुन इच्छुकले गीतमा सिर्जनात्मक भिडियो तयार गरी टिकटकमा पोस्ट गर्नुपर्ने व्यवस्था गरिएको छ । निर्माण पक्षका अनुसार प्रतियोगिताका उत्कृष्ट तीन विजेतालाई नगद पुरस्कार प्रदान गरिनेछ । प्रथम हुनेले ५० हजार रुपैयाँ, दोस्रो हुनेले ३० हजार रुपैयाँ र तेस्रो हुनेले २० हजार रुपैयाँ प्राप्त गर्नेछन् । साथै पाँच जना सहभागीलाई फिल्मको निःशुल्क टिकट पनि उपलब्ध गराइनेछ ।

प्रतियोगितामा सहभागी हुन भिडियो पोस्ट गर्दा #पार्वती #भाद्र१२ #नौतुनारेलैमा ह्यासट्याग अनिवार्य रूपमा प्रयोग गर्नुपर्नेछ । उत्कृष्ट भिडियो र प्राप्त भ्युजका आधारमा विजेता छनोट गरिने निर्माण टिमले जनाएको छ । गीतको भिडियोमा फिल्मका मुख्य कलाकार नीता ढुङ्गाना, दीपाश्री निरौला, अञ्जली अधिकारी, सिरु विष्ट, बसुन्धरा भुसाल, आशा पौडेल, अशोक दर्जी र क्रिमसन श्रेष्ठको नृत्य देख्न सकिन्छ । विवाहका अवसरमा महिलाहरूले खेल्ने रत्यौली संस्कृतिलाई रमाइलो शैलीमा प्रस्तुत गरिएको भिडियोमा दीपाश्री निरौला पुरुषको भेषमा तथा नीता ढुङ्गाना महिलाकै पहिरनमा प्रस्तुत भएकी छन् ।

नीता ढुङ्गानाकै कथा तथा निर्देशनमा बनेको ‘पार्वती’मा उनी स्वयं मुख्य भूमिकामा छिन् । फिल्ममा नीतासँगै दीपाश्री निरौला, अशोक दर्जी, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेललगायत कलाकारको अभिनय रहेको छ । फिल्मको कथा तथा पटकथा नीता ढुङ्गानाको रहेको छ भने स्क्रिप्ट शिवम् अधिकारीले लेखेका हुन् । सुदीप बरालको छायांकन, रामजी लामिछानेको नृत्य निर्देशन रहेको फिल्मका कार्यकारी निर्माता तथा प्रोडक्सन म्यानेजर शंकर पाण्डे हुन् भने निर्माता हरिहर अधिकारी रहेका छन् ।

नीता फिल्म्सको प्रस्तुतिमा निर्माण भएको ‘पार्वती’ आगामी भदौ १२ गतेदेखि देशभर प्रदर्शनमा आउने तयारीमा रहेको छ। निर्माण पक्षका अनुसार गीतको बढ्दो लोकप्रियतासँगै फिल्मप्रति दर्शकको उत्सुकता पनि उल्लेखनीय रूपमा बढ्दै गएको छ ।