नेपालकै प्रतिष्ठित तथा बृहत् मोडलिङ प्रतियोगिता ‘मोडल हन्ट नेपाल २०२६’ का लागि ४२ जना प्रतियोगी छनोट भएका छन् । देशभर सञ्चालन गरिएको अडिसनबाट २६ महिला र १६ पुरुष गरी ४२ प्रतियोगी ग्रान्ड फिनालेका लागि छनोट भएका हुन् । यो प्रतियोगिताको १०औँ संस्करण हो । यस वर्ष ‘नोथिङ स्मार्टफोन’ मुख्य प्रायोजक रहेकाले प्रतियोगिता ‘नोथिङ स्मार्टफोन मोडल हन्ट नेपाल २०२६’ नामबाट आयोजना हुन लागेको आयोजक नेक्स्ट मोडल्स नेपाल की कार्यकारी निर्देशक यतना पाण्डेले जानकारी दिइन्।

छनोट भएका प्रतियोगीले अब एक महिनासम्म विशेष प्रशिक्षण लिनेछन् । प्रशिक्षण अवधिमा व्यक्तित्व विकास, शारीरिक प्रस्तुति, र्याम्प वाक, बडी ल्याङ्ग्वेज, फोटोसुट, एक्सप्रेसनलगायत विभिन्न ग्रुमिङ कक्षामार्फत फाइनलका लागि तयार गराइनेछ । आयोजक संस्थाका अध्यक्ष रवि धमलाका अनुसार प्रतियोगिताका विजेताले ५ लाख रुपैयाँ बराबरको पुरस्कार प्राप्त गर्नुका साथै आगामी सेप्टेम्बरमा कम्बोडियामा आयोजना हुने ‘मिस एन्ड मिस्टर सेलिब्रेटी इन्टरनेशनल’ मा नेपालको प्रतिनिधित्व गर्ने अवसर पनि पाउनेछन्।

व्यावसायिक मोडलिङ क्षेत्रमा आवश्यक ज्ञान, सीप र आत्मविश्वास भएका प्रतिभा उत्पादन गर्ने उद्देश्यसहित विगत १० वर्षदेखि निरन्तर आयोजना हुँदै आएको यस प्रतियोगिताप्रति पछिल्ला वर्षहरूमा युवायुवतीको आकर्षण उल्लेखनीय रूपमा बढ्दै गएको आयोजकको भनाइ छ । प्रतियोगिताले मोडलिङ क्षेत्रमा करिअर बनाउन चाहने युवालाई राष्ट्रिय तथा अन्तर्राष्ट्रिय मञ्चसम्म पुग्ने अवसर प्रदान गर्दै आएको अध्यक्ष धमलाले बताए ।

‘नोथिङ स्मार्टफोन मोडल हन्ट नेपाल २०२६’ को ग्रान्ड फिनाले आगामी जुलाई २४ (साउन ८) मा आयोजना हुनेछ ।