‘रेडियो कान्तिपुर नेशनल म्युजिक अवार्ड–२०८२’ को आठौं संस्करण आगामी असार २६ गते (शुक्रबार) ललितपुरको पुल्चोकस्थित द प्लाजामा आयोजना हुने भएको छ । आयोजकले मंगलबार पत्रकार सम्मेलन गर्दै कार्यक्रमबारे औपचारिक जानकारी दिएको हो ।

यस वर्षको अवार्डमा १४ विधा, लाइफ टाइम अचिभमेन्ट अवार्ड तथा Xtreme Energetic Performer of the Year सम्मान प्रदान गरिने आयोजकले जनाएको छ । अवार्ड समारोहसँगै आयोजना हुने सांगीतिक कार्यक्रममा जोन एण्ड द लोकल्स, दिपक बज्राचार्य, उजन साक्य, समृद्धि राई, मन्त्र ब्याण्ड, शिव परियार, यमन श्रेष्ठ, सलिना बिक, सजिश श्रेष्ठ, प्रभात लामा र कर्मा सिङ लामा लगायतका कलाकारको प्रस्तुति रहनेछ ।

अवार्डअन्तर्गत उत्कृष्ट नव गायक/गायिका, रचनाकार, संगीत निर्देशक, लोकदोहोरी गायक/गायिका, पार्श्व गायक/गायिका, पप गायक/गायिका, सांगीतिक समूह, हिपहप तथा आरएनबी, आधुनिक गायक/गायिकासहित १४ विधामा पुरस्कार प्रदान गरिनेछ । गीत–संगीत तथा कला क्षेत्रमा दीर्घकालीन योगदान पुर्‍याएका व्यक्तित्वलाई १ लाख रुपैयाँ राशिको लाइफ टाइम अचिभमेन्ट अवार्ड प्रदान गरिनेछ। साथै, दर्शकको सहभागितामा पिपुल्स च्वाइस अवार्ड पनि प्रदान गरिनेछ। यसका लागि ई–सेवामार्फत मतदान गर्न सकिने व्यवस्था गरिएको छ ।

आयोजकका अनुसार २०८२ वैशाख १ गतेदेखि २०८२ चैत मसान्तसम्म सार्वजनिक भएका नेपाली गीतहरूलाई आधार बनाएर तीन सदस्यीय निर्णायक समितिले विभिन्न विधाका मनोनयन छनोट गरेको हो । भव्य सांगीतिक महोत्सवका रूपमा आयोजना हुने कार्यक्रममा सयभन्दा बढी कलाकारहरूको सहभागिता रहने जनाइएको छ ।

कान्तिपुर मिडिया ग्रुपका कर्पोरेट एन्ड इभेन्ट म्यानेजर सिम्रन श्रेष्ठले अवार्ड नेपाली संगीत उद्योगको साझा मञ्च बनेको बताइन् । त्यस्तै, कान्तिपुर पब्लिकेसनका चिफ मार्केटिङ अफिसर सागर केसीले पनि नेपाली संगीतको प्रवर्द्धनमा अवार्डले महत्त्वपूर्ण भूमिका खेल्दै आएको उल्लेख गरे ।