गायक तथा र्यापर आर रोयल (रमण खड्गी)को नयाँ गीत ‘माया बस्ला है’ सार्वजनिक भएको छ। केही दिनअघि रिलिज गरिएको गीत विभिन्न डिजिटल स्ट्रिमिङ प्लेटफर्मसँगै सुपरस्टार इन्टरटेन्टमेन्टको आधिकारिक युट्युब च्यानलमार्फत दर्शकमाझ ल्याइएको हो । ‘माया बस्ला है’ सुपरस्टार इन्टरटेन्टमेन्टको दोस्रो म्युजिक भिडियो परियोजना हो । यसअघि कम्पनीले रुथलेसको स्वरमा रहेको ‘नखोज मेरो फाइदा तिमी’ सार्वजनिक गरेको थियो, जसले युट्युबमा ३० लाखभन्दा बढी भ्युज प्राप्त गर्दै उल्लेखनीय सफलता हासिल गरेको थियो ।
गीतमा शब्द तथा संगीत स्वयं आर रोयलकै रहेको छ । आधुनिक डान्सिङ बिट्स र मेलोडिक शैलीमा तयार गरिएको गीतलाई दिप्सन र रुथलेसले निर्माण गरेका हुन् भने मिक्सिङ तथा मास्टरिङको जिम्मेवारी पनि रुथलेसले सम्हालेका छन् । म्युजिक भिडियोमा आर रोयल र निशा श्रेष्ठ मुख्य भूमिकामा देखिएका छन् ।
प्रेम र आकर्षणको भावलाई आधुनिक शैलीमा प्रस्तुत गरिएको भिडियोमा आकर्षक सेट डिजाइन प्रयोग गरिएको छ। भिडियोको कोरियोग्राफी अश्मी भुजेलले गरेकी हुन् भने निर्देशन बिधान प्रधानको रहेको छ । सार्वजनिक भएको छोटो समयमै गीतले युट्युबमा ५ लाखभन्दा बढी भ्युज प्राप्त गरिसकेको छ । गीतको संगीत, दृश्य प्रस्तुति र कलाकारहरूको केमेस्ट्रीलाई दर्शकबाट सकारात्मक प्रतिक्रिया मिलिरहेको निर्माण पक्षले जनाएको छ ।
गीतबारे आर रोयलले आफ्नो भावना र सांगीतिक शैलीलाई नयाँ ढंगले प्रस्तुत गर्ने प्रयास गरेको बताएका छन् । निर्देशक बिधान प्रधानले पनि दर्शकको माया र समर्थनप्रति आभार व्यक्त गर्दै आगामी महिनाहरूमा थप नयाँ सांगीतिक परियोजना सार्वजनिक गर्ने तयारी रहेको जानकारी दिएका छन् ।
