‘द भ्वाइस अफ नेपाल’ सिजन ४ का विजेता गायक करण राईको नयाँ सिर्जना ‘मैनाम’ अ पोइटिक म्युजिक फिल्म सार्वजनिक गरिएको छ । लामो समयपछि फरक शैलीको सांगीतिक प्रस्तुति लिएर आएका करणले यसपटक कविता, संगीत र दृश्यात्मक कथालाई एकसाथ प्रस्तुत गरेका छन् ।

करण राईको आधिकारिक युट्युब च्यानलमार्फत सार्वजनिक गरिएको ‘मैनाम’मा अमर श्रेष्ठ तथा वरिष्ठ गायक–संगीतकार गणेश रसिकको संगीत रहेको छ भने कवि उत्तम तुम्सा लिम्बुको कविता समावेश गरिएको छ । कृतिमा करण राईको स्वर रहेको छ भने कवि उत्तमले स्वयं कविता वाचन गरेका छन् । ‘मैनाम’लाई देवेश राईले एरेञ्ज, मिक्सिङ तथा मास्टरिङ गरेका हुन् । रङ्काशु स्टुडियोमा रेकर्ड गरिएको यो पोइटिक म्युजिक फिल्मले संगीत र साहित्यको सुन्दर संयोजन प्रस्तुत गरेको छ ।

ललितपुरमा आयोजित एक विशेष कार्यक्रमबीच पोइटिक म्युजिक फिल्म सार्वजनिक गरिएको थियो । कार्यक्रममा लेखक तथा निर्देशक उपेन्द्र सुब्बा, चर्चित कवि स्वप्निल स्मृति र लेखक श्याम सिंगकको उपस्थिति रहेको थियो। कृति अवलोकनपछि उनीहरूले ‘मैनाम’को खुलेर प्रशंसा गरेका थिए ।

निर्देशक उपेन्द्र सुब्बाले अमर श्रेष्ठ र गणेश रसिकको सिर्जनात्मक योगदानलाई स्मरण गर्दै करण राई तथा कवि उत्तम तुम्सा लिम्बुको कामको विशेष प्रशंसा गरे । कवि स्वप्निल स्मृति र लेखक श्याम सिंगकले पनि कृतिको विषयवस्तु, प्रस्तुति र कलात्मक पक्षको सराहना गरेका थिए । कवि उत्तम तुम्सा लिम्बुकै लेखन तथा निर्देशन रहेको ‘मैनाम’मा करण राईले अभिनय समेत गरेका छन् । भिडियोमा करणको जोडीका रूपमा सृष्टि मगर देखिएकी छन्। करण र सृष्टिको केमेस्ट्रीले भिडियोलाई थप आकर्षक बनाएको छ ।

डिएनएक्स हाङ्ग्गामको सिनेमाटोग्राफी रहेको भिडियोमा विवेक सुनारको सम्पादन, मिलन विश्वकर्माको कलर तथा पवित्रा राईको सह–निर्देशन रहेको छ । संगीत, कविता र दृश्यात्मक कथाको संयोजनमार्फत तयार गरिएको ‘मैनाम’ले दर्शक तथा साहित्यप्रेमीहरूबाट सकारात्मक प्रतिक्रिया प्राप्त गरिरहेको छ ।