आगामी साउन १ गतेबाट प्रदर्शनमा आउन लागेको नेपाली फिल्म ‘गौँथली’ को नयाँ गीत ‘आँखा भरी आँसु’ सार्वजनिक भएपछि दर्शकमाझ यसको चर्चा बढ्न थालेको छ । विवाह घरको वास्तविक झल्को दिने फरक शैलीमा सार्वजनिक गरिएको गीतले दर्शकको मन जितिरहेको छ । काठमाडौंमा आयोजित विशेष कार्यक्रममा फिल्मका मुख्य कलाकार अरुण क्षेत्री र सिम्रन खड्का बेहुला–बेहुलीको भेषमा उपस्थित भएका थिए ।
पञ्चेबाजाको धुन, जन्तीको नाचगान र विवाह घरजस्तै सजाइएको वातावरणले कार्यक्रमलाई वास्तविक विवाह समारोहको अनुभूति गराएको थियो, जसले उपस्थित दर्शकको विशेष ध्यान आकर्षित गर्यो । सार्वजनिक गीतमा थानेश्वर गौतम र शान्तिश्री परियारको स्वर रहेको छ । थानेश्वरकै संगीत रहेको गीतमा डा. भोला रिजालको शब्द सिर्जना छ । गीतले विवाहपछि माइतीघर छोडेर पराइ घर जानुपर्ने छोरीको पीडा, आमा–बुवासँगको बिछोड र भावनात्मक क्षणलाई मार्मिक ढंगले प्रस्तुत गरेको छ ।
गीतको भिडियोमा अरुण क्षेत्री र सिम्रन खड्कासहित अन्य कलाकारको अभिनय देख्न सकिन्छ । गीतको भाव, शब्द र प्रस्तुतिलाई दर्शकले सकारात्मक प्रतिक्रिया दिन थालेका छन् । कपिल रिजालको निर्देशन रहेको फिल्म ‘गौँथली’ मा मदनकृष्ण श्रेष्ठ, प्रकाश घिमिरे, लुनिभा तुलाधर, रविन्द्र झा, ईश्वरी बराल, सन्जोग रसाइली, सीतादेवी तिमिल्सिना, लक्ष्मीनाथ तिमिल्सिना र राजेन्द्र नेपालीको अभिनय रहेको छ। बाल कलाकारका रूपमा अंशु ओली र प्रिन्स नेपाली देखिएका छन् ।
डा. भोला रिजालको कथामा आधारित फिल्मको पटकथा तथा संवाद लेखनमा निर्देशक कपिल रिजालसँगै निश्चल कुँवर, निरज नेपाल र गिरिराज घिमिरेको सहकार्य रहेको छ । भोला रिजाल प्रोडक्सन र सुमन गिरी प्रोडक्सनको प्रस्तुतिमा निर्माण भएको फिल्मका कार्यकारी निर्माता सरला रिजाल हुन् । निर्माता सुमन गिरी र डा. कपिल रिजाल रहेका छन् भने इन्दु गिरी, मनिष रिजाल, प्रलय रिजाल र जीवन ओली सह–निर्माताको रूपमा रहेका छन् ।
शम्भुजीत बास्कोटा, थानेश्वर गौतम र प्रशान्त सिवाकोटीको संगीत रहेको फिल्ममा हरि हुमागाईंको छायांकन, मिलन श्रेष्ठको सम्पादन, एलिस कार्कीको पाश्र्व संगीत, रामजी लामिछाने र मौसम हिमालीको कोरियोग्राफी रहेको छ । रिच इन्टरटेनमेन्ट, एप्पल इन्टरटेनमेन्ट र एफडी कम्पनीले वितरण गर्ने फिल्म ‘गौँथली’ नाममा दुई दशकअघि निर्माण भएको सफल गीति फिल्मको नयाँ स्वरूप पनि हो, जसले प्रदर्शनको समयमा ५१ दिन मनाएर सफलता हासिल गरेको थियो ।
