निर्देशक ओम प्रतीकको लेखन तथा निर्देशनमा निर्माण भएको नेपाली फिल्म ‘हली’ आगामी साउन २२ गतेदेखि देशभर प्रदर्शनमा आउने भएको छ। निर्माण टिमले शुक्रबार दुईवटा आधिकारिक पोस्टर सार्वजनिक गर्दै प्रदर्शन मिति घोषणा गरेको हो । पुजा गुरुङ र जश्मिन श्रेष्ठको निर्माण रहेको फिल्मको सार्वजनिक पोस्टरले फिल्मको कथावस्तुप्रति उत्सुकता जगाएको छ । पोस्टरमा ओम प्रतीक, सरोज खनाल, प्रमोद दीप र सुजता थापा गम्भीर तथा आक्रोशपूर्ण भावमा देखिएका छन्, जसले पात्रहरूबीचको द्वन्द्व र सम्बन्धको जटिलतालाई संकेत गर्छ ।
उनीहरूको पछाडि घरको दैलोमा थाल बोकेर बसेका दुई महिलाको दृश्यले सामाजिक विभेद, श्रम र नारी पीडाको कथालाई उजागर गर्ने संकेत दिएको छ । निर्माण पक्षका अनुसार वास्तविक जीवनका घटनाबाट प्रेरित फिल्मले समाजमा परिवर्तन ल्याउन एक जना ‘हली’ नै पर्याप्त हुन सक्छ भन्ने सशक्त सन्देश बोकेको छ । गत वर्ष व्यावसायिक सफलता हासिल गरेको फिल्म ‘मोहर’ निर्देशन गरेका ओम प्रतीक यसपटक पनि सामाजिक कथावस्तुमा आधारित फरक शैलीको फिल्म लिएर दर्शकमाझ आउँदैछन् ।
जापुरा फिल्मस् प्रोडक्सन र शुभ चिरायू फिल्मस्को सहकार्यमा निर्माण भएको फिल्ममा प्रमोद दीप, सुजता थापा, सरोज खनाल, अरुणा कार्की, अर्जुन गुरुङ, विद्या कार्की, नवीन श्रेष्ठ, कञ्चन दुलाल, कमल गाउँले, विशाल पहाडी तथा निर्देशक ओम प्रतीक स्वयंको अभिनय रहेको छ । फिल्मको विशेष आकर्षणका रूपमा समावेश गरिएको प्रमोशनल गीतमा दीपाश्री निरौला, किरण केसी, दिलीप रायमाझी, प्रियंका कार्की र पूजा शर्माको विशेष नृत्य प्रस्तुति रहनेछ ।
गीतको कोरियोग्राफी कविराज गहतराजले गरेका हुन् भने फिल्मका अन्य गीतमा ओम प्रतीक र कविराज गहतराजको संयुक्त कोरियोग्राफी रहेको छ । पूजा गुरुङ र जश्मिन श्रेष्ठ निर्माता रहेको फिल्ममा अर्जुन भुसाल कार्यकारी निर्माता, नम्रता भण्डारी सह–निर्मात्री, लक्ष्मण बज्राचार्य लाइन प्रोड्युसर तथा जीवननाथ गौतम मुख्य सहायक निर्देशक रहेका छन् । राहुल राईको छायांकन रहेको चलचित्रको सम्पादन रामप्रसाद चौधरी र विपिन मल्लले गरेका छन् ।
फिल्ममा शम्भुजित बास्कोटा, बाबुल गिरी र कृष्ण भारद्वाजको संगीत रहेको छ । जश्मिन श्रेष्ठको शब्द तथा बाबुल गिरीको संगीतमा तयार गीतमा बाबुल गिरी र शान्तिश्री परियारको स्वर सुन्न सकिनेछ । कुमार महर्जनको द्वन्द्व निर्देशन रहेको फिल्मलाई नेशनल सिने ग्रुप प्रालिले वितरण गर्नेछ भने डिजिटल पार्टनर ओएसआर डिजिटल रहेको छ ।
