निर्देशक नवीन सुब्बाले फिल्म ‘मितज्यू’ले नेपाली समाजका विभिन्न तहलाई एकसाथ प्रस्तुत गरेको बताएका छन् । उनका अनुसार फिल्मले राजनीतिक, सामाजिक, आर्थिक र पारिवारिक पक्षलाई गहिरो ढंगले उठाएको छ । ‘मितज्यू’बारे प्रतिक्रिया दिँदै निर्देशक सुब्बाले फिल्मले अहिलेको नेपाली राजनीतिक परिवेशलाई प्रतीकात्मक रूपमा चित्रण गरेको बताए । उनले भने, “पुराना पार्टी समाप्त हुँदै नयाँ सोच आउँदै गरेको कुरा फिल्मले लाक्षणिक रूपमा देखाएको छ । चरित्र निर्माण गर्दाखेरि नै यो कुरा समेटिएको छ ।”
उनका अनुसार नेपाली फिल्ममा यस किसिमको राजनीतिक सन्दर्भ र सामाजिक विमर्शलाई कथामा यसरी प्रस्तुत गरिएको विरलै देख्न पाइन्छ । “पोलिटिकल इभेन्टलाई स्टोरीमा ढालेर चरित्रमार्फत सिम्बोलिक रूपमा राम्रोसँग उतारिएको छ,” उनले भने । नयाँ कलाकार भए पनि तेरिया मगरले प्रभावशाली अभिनय गरेको भन्दै नवीनले उनको खुलेर प्रशंसा गरे । “तेरियाको काम डेब्यु फिल्मजस्तो लाग्दैन । दयाहाङ र सौगातजस्ता स्थापित कलाकारसँग उनले निकै खारिएको अभिनय गरेकी छन्, जुन ‘मितज्यू’को अर्को उपलब्धि हो,” उनले भने ।
दयाहाङ राई र सौगात मल्लको अभिनय पनि निकै प्रभावशाली रहेको उनको भनाइ छ । “आवरण र इमोसन दुवै हिसाबले दयाहाङ र सौगातले गज्जबको काम गरेका छन्,” उनले बताए । फिल्मले नेपाली समाजमा परिवारको परम्परागत अवधारणालाई समेत प्रश्न गर्ने निर्देशक सुब्बाको धारणा छ । “यो फिल्मले धेरै च्यालेन्ज गरेको छ । हामीमा परिवारको जे कन्सेप्ट छ, त्यसलाई नै प्रश्न गरेको छ । रोल्पा र रुकुमको लोकल कथा उठाएर यसले समग्र नेपाली समाजको सोचमाथि प्रश्न गर्छ,” उनले भने ।
यस्ता विषयवस्तु भएका चलचित्र बन्नु आवश्यक रहेको उल्लेख गर्दै उनले दर्शकले यस्ता सिनेमालाई माया गर्नुपर्ने बताए । “यस्ता फिल्मलाई साथ दिइयो भने अझ धेरै यस्ता कथा बन्नेछन् र यसले समाज निर्माणमै सहयोग पुर्याउँछ,” उनले थपे । शुक्रबारदेखि प्रदर्शनमा आएको ‘मितज्यू’मा दयाहाङ राई, सौगात मल्ल र तेरिया मगर मुख्य भूमिकामा छन् । साथै फिल्ममा खड्गबहादुर पुन मगर, शिशिर वाङ्देल, पुस्कर गुरुङ, राज थापा, सुवर्ण थापा, अनु थापा र स्मिता लामिछानेलगायत कलाकारको अभिनय रहेको छ ।
जीएम मुभिज प्रोडक्सनको ब्यानरमा निर्माण भएको फिल्मका निर्माता जनक घर्ती मगर हुन् भने निर्देशन अनिल बुढा मगरले गरेका छन् । फिल्ममा लोकेश बज्राचार्यको सम्पादन र शिशिर बिशंखेको छायांकन रहेको छ । ‘मितज्यू’लाई आरआर फिल्म्सले नेपालभर वितरण गरिरहेको छ ।
