गायक सोम गुरुङको नयाँ लोक–पप गीत ‘चौंरीको गोठ’ सार्वजनिक गरिएको छ । नेपाली पहाडी जनजीवन, संस्कृति र प्रेमलाई समेटेर तयार पारिएको गीतले दर्शक तथा स्रोतामाझ सकारात्मक प्रतिक्रिया पाइरहेको छ । गीतमा प्रेम, सम्झना र समर्पणको भावलाई निकै मार्मिक ढंगले प्रस्तुत गरिएको छ । विशेषगरी “रङ्गीन फोटो कान्छीको, खल्तीमा राख्दा राख्दै सादा भो…” भन्ने बोलले प्रेमीको निष्कपट माया र समयसँगै गहिरिँदै गएको भावनालाई उजागर गर्छ ।

गीतका शब्द रमेश दाहालले लेखेका हुन् भने संगीत केशव पौडेलले तयार गरेका छन् । गीतको संगीत संयोजन जुगल डंगोलको रहेको छ । सार्वजनिक गीतको भिडियोमा कलाकार सुरेश कोली र रश्मी गुरुङको अभिनय देख्न सकिन्छ । उनीहरूलाई बाल कलाकार काफिया प्रिले साथ दिएका छन् । भिडियोको सुरुवातमै सारङ्गीको मधुर धुन, परम्परागत नेपाली भेषभूषा र सामूहिक नृत्यले दर्शकलाई आकर्षित गर्छ ।

पहाडी भूगोल, हरियाली र गाउँघरको परिवेशलाई जीवन्त ढंगले प्रस्तुत गरिएको भिडियोले नेपाली मौलिकपनलाई झल्काएको छ । अनुभवी निर्देशक समन अधिकारीको निर्देशन रहेको भिडियोमा नेपाली कला, संस्कृति र प्रेमलाई आधुनिक सिनेम्याटिक शैलीमा उतारिएको छ । भिडियोको दृश्य संयोजन र प्रस्तुतिले गीतलाई अझ प्रभावकारी बनाएको दर्शकको प्रतिक्रिया छ ।

‘चौंरीको गोठ’ ले लोक स्वादसँगै आधुनिक प्रस्तुति मिसाएर समकालीन नेपाली संगीत बजारमा फरक पहिचान बनाउने अपेक्षा गरिएको छ ।