‘पाँचौँ क्वालिटी इन्टरटेनमेन्ट अवार्ड २०८२’ आयोजना हुने भएको छ । क्वालिटी फिल्मस् प्रा.लि.को आयोजनामा हुन लागेको अवार्डका लागि यही जेठ ७ गतेदेखि आवेदन फारम खुला गरिएको आयोजकले जनाएको छ । आयोजक संस्थाका अध्यक्ष उमेश गुरुङका अनुसार २०८२ साल वैशाख १ गतेदेखि चैत ३० गतेसम्म सार्वजनिक भएका गीत, म्युजिक भिडियो तथा फिल्महरूले अवार्डमा सहभागिता जनाउन पाउनेछन् ।

अवार्डमा फिल्म, गीत–संगीत, म्युजिक भिडियो, फेसन तथा मोडलिङ क्षेत्रका विभिन्न विधामा सम्मान तथा पुरस्कार प्रदान गरिनेछ । गीत–संगीततर्फ लोक, आधुनिक, पप आधुनिक, लोकदोहोरी, पर्व गीत, भेग विशेष गीत, राष्ट्रिय भावका गीत तथा चलचित्र गीत समावेश गरिएको छ । यी विधाअन्तर्गत गायक–गायिका, संगीतकार, गीतकार, संगीत संयोजक, ध्वनि मिश्रणलगायतका श्रेणीमा आवेदन खुला गरिएको आयोजकले जनाएको छ ।

यस्तै म्युजिक भिडियोतर्फ निर्देशक, महिला तथा पुरुष मोडल, छायाँकार, सम्पादक, नृत्य निर्देशक लगायतका विधामा अवार्ड प्रदान गरिनेछ । फिल्म विधामा पनि २०८२ सालभर रिलिज भएका फिल्महरूले सहभागिता जनाउन पाउनेछन् । यसअन्तर्गत निर्देशक, नायक, नायिका, नवनायक, नव–नायिका, सह–नायक, सह–नायिका, खलचरित्र, चरित्र अभिनेता–अभिनेत्री, हास्य अभिनेता, छायाँकार, सम्पादक, रंग संयोजक, संगीतकार, भिएफएक्स आर्टिस्ट तथा प्रोडक्सन म्यानेजरलगायतका विधामा आवेदन खुला गरिएको छ ।

“नेपाली फिल्म तथा गीत–संगीतको बजारलाई चलायमान बनाउँदै सर्जकलाई सम्मान र गुणस्तरीय सिर्जनालाई प्रोत्साहन गर्ने उद्देश्यले विगत पाँच वर्षदेखि अवार्ड आयोजना गर्दै आएका छौं,” अध्यक्ष उमेश गुरुङले बताए । उनका अनुसार अवार्डका लागि आवेदन फारम आगामी साउन महिनाको अन्तिमसम्म बुझाइसक्नुपर्नेछ । फारम आयोजक संस्था तथा अवार्डको आधिकारिक पेजमार्फत प्राप्त गर्न सकिने जनाइएको छ ।