निर्देशक विनयराज पौडेलको डेब्यु निर्देशन रहने नेपाली चलचित्र ‘अक्षरा’को औपचारिक छायांकन सुरु भएको छ । निर्माण पक्षले सोमबारदेखि काठमाडौंबाट फिल्मको सुटिङ सुरु गरेको हो । यसअघि काठमाडौंस्थित गुहेश्वरी मन्दिरमा स्क्रिप्ट पूजा (मुहूर्त) सम्पन्न गरेपछि फिल्म निर्माण प्रक्रिया अघि बढाइएको थियो ।
फिल्मको छायांकन तालिका एक महिनाको तय गरिएको निर्माण पक्षले जनाएको छ । निर्देशक विनयराज पौडेलले सम्पूर्ण तयारी र गृहकार्यपछि मात्रै फिल्म फ्लोरमा गएको जानकारी दिए । उनले भने, “कथाको मागअनुसार पटकथा र संवादमा पर्याप्त मेहनत गरेका छौँ। कलाकारहरूलाई कार्यशाला गराएर मात्र छायांकनमा ल्याएका हौँ। फिल्मले दर्शकलाई निराश बनाउने छैन ।”
क्षित बाबु प्रोडक्सन हाउसको प्रस्तुति रहेको चलचित्रमा सुशील सिटौला, न्यान्सी खड्का, सुशील पोखरेल, पुष्कर राउत, रिस्ता अधिकारी, अंशु महर्जन, गीता अधिकारी, वीरेन्द्र कुशवाह र सृजना अधिकारीको मुख्य अभिनय रहनेछ । फिल्ममा बालकलाकारका रूपमा रोनक खड्का र प्रीसा ढुङ्गानाको पनि अभिनय रहने निर्माण पक्षले जनाएको छ ।
फिल्मका कार्यकारी निर्माता सुरज थापाकाजी हुन् भने निर्मातामा उग्रसेन ढुङ्गाना र सुग्रसेन ढुङ्गाना रहेका छन् । अभिमन्यु निरवीको पटकथा तथा संवाद रहेको फिल्ममा सुरेन्द्र रानाको शब्द र कर्णराज गिरीको संगीत रहनेछ । फिल्मको छायांकन दिपेन बस्न्यातले गरिरहेका छन् भने कोरियोग्राफी रामजी लामिछाने र द्वन्द्व निर्देशन शंकर महर्जनको रहनेछ ।
यस्तै, फिल्ममा मदन न्यौपानेको श्रृङ्गार, प्रार्थना भट्टराईको भेषभूषा तथा सुमन काफ्लेको निर्माण व्यवस्थापन रहनेछ। पोस्टर डिजाइन राकेश दाहालले गरेका हुन् । फिल्मलाई नेशनल सिने ग्रुपमार्फत दीपक दंगालले वितरण गर्नेछन् । मुख्य सहायक निर्देशकमा दिवस बोहरा र सहायक निर्देशकमा मनोज बोहरा रहेका छन् ।
निर्देशक विनयराज पौडेलले यसअघि दर्जनौँ नेपाली फिल्ममा सहायक निर्देशकका रूपमा काम गरिसकेका छन्। लामो अनुभवपछि उनले ‘अक्षरा’मार्फत स्वतन्त्र निर्देशनमा पाइला चालेका हुन् ।
