अभिनेत्री शिल्पा मास्के विवाह बन्धनमा बाँधिएकी छन् । उनले बिहीबार प्रेमी तथा ट्याटु आर्टिस्ट फ्लावर केसीसँग विवाह गरेकी हुन् । उनीहरूको विवाह हिमालपारिको जिल्ला मुस्ताङस्थित कोबाङ गाउँको थासाङ भिलेजमा सम्पन्न भएको हो । विवाह समारोहमा दुवै पक्षका सीमित पारिवारिक सदस्यहरूको उपस्थिति रहेको थियो ।

शिल्पाले विवाहका तस्वीरहरू सामाजिक सञ्जाल फेसबुक र इन्स्टाग्राममार्फत सार्वजनिक गर्दै प्रकृतिको बीचमा विवाह गर्ने सपना पूरा भएको उल्लेख गरेकी छन् । “एक समय कल्पनामा मात्र रहेको सपना आज हाम्रो जीवनको सबैभन्दा सुन्दर सम्झनामध्ये एक बनेको छ,” उनले लेखेकी छन् ।

कामको कुरा गर्दा शिल्पा पछिल्लो पटक आफूले निर्माण गरेको फिल्म देवीमा देखिएकी थिइन् । २०८१ सालमा रिलिज भएको उक्त फिल्मले भने व्यावसायिक सफलता हासिल गर्न सकेन । उनले सन् २०१९ मा प्रदर्शन भएको फिल्म द ब्रेकअपबाट अभिनेत्रीको रूपमा डेब्यु गरेकी थिइन् ।
https://www.instagram.com/shilpamaskey_/?utm_source=ig_embed&ig_rid=69778c42-9d07-4e8c-a26d-520c1a42beeb
त्यसपछि उनले कागजपत्र, सानो मन, कठपुतली, लाइफ इन एलए, परस्त्री र फूलबारी लगायत फिल्ममा अभिनय गरिसकेकी छन् । शिल्पा चाँडै नयाँ फिल्म जलाकीमा देखिँदैछिन् ।