लोकप्रिय हास्य टेलिभिजन रियालिटी शो ‘कमेडी नाइट विथ च्याम्पियन्स’ले पहिलो सिजनको सफलतापछि दोस्रो सिजन औपचारिक रूपमा सुरु गरेको छ । निर्माण टिमले हाल प्रसारण भइरहेको ५४औं एपिसोडलाई ‘च्याप्टर–२’का रूपमा अघि बढाउँदै नयाँ सिजनको घोषणा गरेको हो । निर्देशक तथा प्रस्तोता विशाल भण्डारीका अनुसार दर्शकको उच्च मागलाई ध्यानमा राख्दै शो कुनै ब्रेक बिना निरन्तर रूपमा अघि बढाइएको हो । उनले पहिलो सिजनकै निरन्तरतामा दोस्रो सिजन सुरु गरिएको बताए ।

नयाँ सिजनको सुरुवाती एपिसोडमा फिल्म ‘मालती मंगले’को निर्माण टिम तथा कलाकारहरू विशेष अतिथिको रूपमा सहभागी भएका थिए । कार्यक्रममा वर्षा राउत, विजय बराल, मेक्सम गौडेल, रामकृष्ण ढकाल, निर्देशक प्रकु पाण्डेय, कार्यकारी निर्माता सागर ज्ञवाली र गायिका ऋतिका श्रेष्ठको उपस्थिति रहेको थियो । शोमा पवन भट्टराई, प्रभात लामा, कर्मासिंह लामा, भरतमणि पौडेल, कैलाश कार्की र सुमन कोइरालालगायत कलाकारहरूले प्रस्तुत गरेका हास्य सेग्मेन्टले दर्शकलाई भरपुर मनोरञ्जन दिएका छन् । विशेषगरी पवन भट्टराईले ‘कबड्डी’ फिल्मको बीके पात्रमा दिएको प्रस्तुति निकै चर्चित बनेको छ ।

त्यस्तै, प्रभात लामा र कर्मा लामाको ‘सुदन–सुशीला’ जोडी सामाजिक सञ्जालमा भाइरल बन्दै गएको छ भने भरतमणि र सुमनले मेक्सम गौडेललाई रोस्ट गर्दै दिएको प्रस्तुति पनि दर्शकको ध्यान खिच्न सफल भएको छ । यस सिजनमा केही परिवर्तनहरू पनि गरिएको छ । कलाकार सन्तोष थापा शोबाट बाहिरिएका छन् भने कर्मा लामा अब नियमित प्रस्तोता कलाकारका रूपमा देखिनेछन् । स्क्रिप्ट लेखनमा कर्मा लामासँगै निश्चल अर्याल र प्रतीक अधिकारीको सहकार्य रहेको छ ।

दीपाश्री निरौला अध्यक्ष रहेको थ्री प्रोडक्सनको प्रस्तुति रहेको यो शो प्रत्येक मंगलबार राति ९ बजे हिमालय टेलिभिजनमा प्रसारण हुँदै आएको छ । साथै, ओएसआर रियालिटी युट्युब च्यानलमार्फत पनि सार्वजनिक भइरहेको छ ।