८ जेठदेखि प्रदर्शनमा आउने तयारीमा रहेको फिल्म ‘काजी’को दोस्रो पोस्टर सार्वजनिक गरिएको छ । निर्माताले सामाजिक सञ्जालमार्फत पोस्टर सार्वजनिक गर्दै फिल्मप्रति दर्शकको उत्सुकता बढाएका छन् । सार्वजनिक पोस्टरमा विपिन कार्की र केकी अधिकारी रोमान्टिक भावमा देखिएका छन् । उनीहरूलाई एकअर्कालाई अँगालो हालेको अवस्थामा प्रस्तुत गरिएको छ, जसले फिल्म प्रेमकथा र भावनात्मक सम्बन्धमा केन्द्रित रहेको संकेत गर्छ ।

पोस्टरमा विपिन कार्कीलाई ढाका टोपी, सर्ट र गञ्जीमा देखाइएको छ भने केकी अधिकारी रातो सारी, हरियो ब्लाउज, सिन्दूर र टीकासहित परम्परागत नेपाली पहिरनमा प्रस्तुत भएकी छिन्। यसले नेपाली संस्कृति र पारिवारिक सम्बन्धको झल्को दिन्छ । पृष्ठभूमिमा गाउँघरको वातावरण, तोरीका फूलले ढाकिएको खेत र पुरानो शैलीको घर देखिन्छ, जसले फिल्म ग्रामीण परिवेशमा आधारित रहेको अनुमान गर्न सकिन्छ ।

रामप्रसाद रिजालको प्रस्तुति रहेको फिल्मलाई लक्ष्मण रिजालले निर्देशन गरेका हुन् । निर्माताका अनुसार फिल्मले मानवीय सम्बन्ध, माया, पीडा र जिम्मेवारीका विभिन्न आयामलाई उठाएको छ । फिल्ममा विपिन कार्की र केकी अधिकारीसहित गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट, हिउँवाला गौतम, सन्दिपबाबु लोहनी, रोजी श्रेष्ठ, गंगा शर्मा, नवराज गिरी, बुद्धिसागर खनाल, प्रशंसा सुवेदी, कृतिका शर्मा र दिक्षिता अर्याल लगायतको अभिनय रहेको छ ।

रिजाल एन्ड रिजाल प्रोडक्सनको ब्यानरमा निर्माण भएको फिल्मको कथा प्रदीप भारद्धाजले लेखेका हुन् । असिम काफ्ले कार्यकारी निर्माता रहेका छन् भने नेहान रिजाल र विकासराज जोशी निर्माता हुन् । फिल्मलाई श्रीराम बालाजी फिल्म्सले देशभर वितरण गर्नेछ ।