फिल्म रोल नं १ को टाइटल गीत सार्वजनिक गरिएको छ। सेभेन सिज सिनेमाको ब्यानरमा निर्माण भएको यस सिनेमाको टाइटल सङ सार्वजनिक भएसँगै यसको विषयवस्तु झन् स्पष्ट भएको छ । गीतमा प्रशान्त शिवाकोटी को शब्द, संगीत तथा स्वर रहेको छ। सार्वजनिक गीतले नेपाली शिक्षा प्रणाली र विद्यालय तहमा हुने ‘र्याङ्किङ’को दौडमा बालबालिकाले भोग्नुपर्ने मानसिक दबाबलाई मुख्य विषय बनाएको छ ।

गीतमार्फत ‘अरू सबै मुर्ख, एउटै मात्र विद्वान’ भन्ने सोचप्रति व्यङ्ग्य गरिएको छ, जहाँ विद्यालयमा पहिलो हुने विद्यार्थीलाई मात्र सम्मान गर्ने प्रवृत्तिमाथि प्रश्न उठाइएको छ। यसले बालमनोविज्ञानलाई केलाउँदै गलत शैक्षिक प्रणालीले बालबालिकामा पार्ने असरलाई चित्रण गरेको छ । भिडियोमा हिमाली भेगको सुन्दर दृश्य, परम्परागत घर र ग्रामीण विद्यालयको जीवनशैलीलाई कलात्मक ढंगले प्रस्तुत गरिएको छ ।

एकातिर मैनबत्तीको उज्यालोमा राति अबेरसम्म पढ्न बाध्य बालक देखिन्छ भने अर्कोतर्फ उसको खेल्ने–घुम्ने चाहना दबिएको दृश्यले कथाको भावनात्मक पाटोलाई उजागर गर्छ । ‘रट्टा मार’ संस्कृतिमाथि पनि गीतले तीखो प्रहार गरेको छ । ‘हरेक विद्यार्थीको कथा’ भन्ने स्लोगनसहित तयार भएको यो फिल्म आगामी जेठ १५ गते (गणतन्त्र दिवस)बाट प्रदर्शनमा आउनेछ । निर्देशक जोन योञ्जन को निर्देशनमा बनेको फिल्ममा मुकुन भुसाल, सुशांक मैनाली, रेणु योगी र सिर्जना अधिकारीको मुख्य भूमिका रहेको छ ।

बाल कलाकारहरूमा निर्भिक रेग्मी, रिन्चेन लामा, संयम कटुवाल र सिजल श्रेष्ठ रहेका छन् । विनोद पौडेल र जान्वी पौडेल निर्माता रहेको फिल्मको कथा महेश दवाडी ले लेखेका हुन् । म्याग्दीका विभिन्न ग्रामीण भेगमा छायांकन गरिएको यस फिल्मले नेपाली समाजको यथार्थ र शिक्षा प्रणालीको संवेदनशील पक्षलाई उजागर गर्ने अपेक्षा गरिएको छ ।