चैत १९ देखि २३ सम्म आयोजना हुन लागेको नवौं संस्करणको नेपाल अन्तर्राष्ट्रिय चलचित्र महोत्सव (निफ)मा ‘रसियन फिल्म डेज नेपाल २०२६’ अन्तर्गत पाँच रसियन फिल्महरू स्क्रिनिङ हुने भएका छन् । आयोजकका अनुसार निफको दोस्रो दिन चैत २१ गते कमलपोखरीस्थित रसियन हाउसमा ‘अगस्ट’, ‘द च्यालेन्ज’, ‘द डिनो फ्यामिली’ र ‘अल रङ गर्ल’ प्रदर्शन गरिनेछ।
त्यसैगरी, फेलिक्स उमारोभ निर्देशित रसियन फिल्म ‘द पोएट’ अन्तर्राष्ट्रिय प्रतिस्पर्धाअन्तर्गत चैत २३ गते बिहान ११ बजे ठमेलस्थित छाया सेन्टरमा स्क्रिनिङ हुनेछ। यो फिल्म रुसी कवि अलेक्जेन्डर पुश्किनको जीवनीमा आधारित छ। निफ अध्यक्ष केपी पाठकका अनुसार नेपाल र रुसबीच सांस्कृतिक आदान–प्रदान प्रवर्द्धन गर्नुका साथै नेपाली चलचित्रकर्मीको अन्तर्राष्ट्रिय सम्बन्ध विस्तार गर्ने उद्देश्यले ‘रसियन फिल्म डेज’ कार्यक्रम समावेश गरिएको हो।
“नेपाली दर्शक तथा चलचित्रकर्मीले रसियन चलचित्र, कला र प्रविधिबारे बुझ्ने तथा त्यहाँका मेकरहरूसँग सम्बन्ध विस्तार गर्ने अवसर पाउनेछन्,” पाठकले बताए । नेपाल र रुसबीच कूटनीतिक सम्बन्ध स्थापना भएको ७० वर्ष पूरा भएको अवसर पारेर यसपटक निफमा रसियन फिल्म समावेश गरिएको आयोजकले जनाएको छ । आयोजकका अनुसार महोत्सवमा ४० देशका ८८ फिल्म प्रदर्शन गरिनुका साथै विभिन्न विषयमा १० वटा अन्तरक्रियात्मक कार्यक्रमहरू समेत आयोजना गरिनेछ। कार्यक्रमसम्बन्धी थप विवरण निफको आधिकारिक सामाजिक सञ्जाल तथा वेबसाइटमार्फत सार्वजनिक गरिनेछ।
एतिहासिक–थ्रिलर जनरामा बनेको ‘अगस्ट’ दोस्रो विश्वयुद्धको उत्तरार्धका घटनामा आधारित छ, जसमा सोभियत रेड आर्मीमाथि हुनसक्ने आक्रमण रोक्न काउन्टर इन्टेलिजेन्स एजेन्सीले गरेको संघर्ष देखाइएको छ। फिल्म इल्या लेबेदेव र निकिता वैसोत्स्कीले संयुक्त रूपमा निर्देशन गरेका हुन्।
क्लिम शिपेन्कोद्वारा निर्देशित ‘द च्यालेन्ज’ अन्तरिक्षमा छायांकन गरिएको पहिलो फिल्म हो। अन्तरिक्ष स्टेशनमा पुगेकी एक चिकित्सकले बिरामीको शल्यक्रिया गर्नुपर्ने साहसिक कथाले फिल्मलाई रोचक बनाएको छ। म्याक्सिम भोल्कोभ निर्देशित ‘द डिनो फ्यामिली’ एडभेन्चर–पारिवारिक कथामा आधारित छ, जसमा एक किशोरी डाइनोसर युगमा पुगेर जीवन रक्षाका लागि संघर्ष गर्छिन्।
इभानोभा अलेक्जान्द्राद्वारा निर्देशित ‘अल रङ गर्ल’ले विद्यालयस्तरको बुलिङको विषय उठाएको छ। मोटोपनका कारण अपमानित भएकी किशोरीको विद्रोहलाई फिल्ममा प्रस्तुत गरिएको छ।
