निर्देशक तुलसी घिमिरेको निर्देशनमा तयार भएको फिल्म ‘पहाड’को पहिलो गीत ‘मोहनी लगाउने’ सार्वजनिक गरिएको छ। काठमाडौंको कमलपोखरीस्थित एक हलमा आयोजित पत्रकार सम्मेलनमार्फत गीत सार्वजनिक गरिएको हो । सार्वजनिक गीतमा नवअभिनेत्री पञ्चमी घिमिरे र अभिनेता अरुण क्षेत्री फिचर्ड छन्। गीतमा निर्देशक तुलसी घिमिरेकै शब्द, रञ्जित सिंह गजमेरको संगीत रहेको छ भने भारती घिमिरे, साकार आप्टे, मदनकृष्ण श्रेष्ठ र अश्मिता अधिकारीको स्वर सुन्न सकिन्छ। साथै गीतमा अभिनेता विपिन कार्कीको र्याप पनि समावेश गरिएको छ। गीतको नृत्य निर्देशन कविराज गहतराजले गरेका हुन्।
गीत ग्रामीण परिवेशमा छायांकन गरिएको छ र नृत्यप्रधान तथा मिठासपूर्ण लाग्छ। गीतमार्फत गाउँको सौन्दर्य, युवाहरु विदेशिनुपर्ने बाध्यता र सहरभन्दा गाउँ नै उपयुक्त रहेको सन्देश प्रस्तुत गरिएको छ । कार्यक्रममा निर्देशक तुलसी घिमिरेले केही वर्षको अन्तरालपछि सशक्त कथावस्तु छनोट गरेर फिल्म निर्माण गरेको बताए। उनले भने, “यो विषयलाई फिल्ममार्फत दर्शकसम्म पुर्याउनुपर्छ भन्ने लागेर मैले फिल्म बनाएको हुँ। यसमा मनोरञ्जनसँगै महत्वपूर्ण सन्देश पनि समेटिएको छ, जुन यस गीतमा पनि झल्किन्छ।”
कार्यक्रममा चलचित्र विकास बोर्डका अध्यक्ष दिनेश डिसीले निर्देशक घिमिरेको योगदानको प्रशंसा गर्दै परिवारकै समर्पण उल्लेख गरे। “तुलसी दाइको परिवार नै यस फिल्ममा समर्पित भएर लागेको छ। उहाँकी कान्छी छोरी पञ्चमीको डेब्यु पनि यही फिल्मबाट भएको छ। उहाँको कथ्यशैलीको म सधैं प्रशंसक हुँ,” उनले भने । आगामी २०८३ सालको वैशाख १ गते अर्थात् नयाँ वर्षको दिन प्रदर्शनमा आउने फिल्मले पहाडबाट युवाशक्ति विदेश पलायन हुँदा उत्पन्न हुने सामाजिक र आर्थिक समस्यालाई चित्रण गर्नेछ।
भाग्यरत्न फिल्म्स प्रा.लि.को ब्यानरमा निर्माण भएको ‘पहाड’मा विपिन कार्की, सुनिल थापा, मदनकृष्ण श्रेष्ठ, रेनुनाथ योगी, अरुण क्षेत्री, रवीन्द्रसिंह बानियाँ र उमा गिरीलगायत कलाकारको अभिनय रहेको छ । निर्देशक घिमिरेले आफ्नी कान्छी छोरी पञ्चमी घिमिरेलाई यसै फिल्ममार्फत अभिनेत्रीका रूपमा डेब्यु गराएका छन् भने जेठी छोरी भावना घिमिरेले प्रोडक्सन डिजाइनरको जिम्मेवारी सम्हालेकी छिन् ।
फिल्ममा रञ्जित सिंह गजमेर संगीत निर्देशक रहेका छन्। उत्तम रसाइली प्रस्तुतकर्ता रहेको फिल्ममा सुरेन्द्र लामा थिङ, ओजस्वी केसी, रिम्पोछे लामा थिङ, दमन्ती रसाइली र उमा गिरी निर्माता रहेका छन् भने भारती घिमिरे क्रिएटिभ निर्माता हुन् । फिल्मलाई नेपालमा वैङ्कटेश इन्टरटेनमेन्ट र अन्तर्राष्ट्रिय बजारमा सेभेन सिज इन्टरनेशनल फिल्म्सले वितरण गर्नेछन्। पब्लिसिटी डिजाइन रोयल भीमसेन र ट्राइडेन्ट कन्सेप्टले गरेका छन् ।
फिल्ममा कविराज गहतराज र मिङमा डी लेप्चाको नृत्य निर्देशन, कुमार महर्जनको द्वन्द्व निर्देशन तथा शङ्कर कोइराला र भारती घिमिरेको सम्पादन रहेको छ ।
