निर्माता सुशील पोखरेलको फिल्म ‘परालको आगो’को टिजर सार्वजनिक गरिएको छ । निर्माण टिमले ओएसआर डिजिटल युट्युब च्यानलमार्फत फिल्मको टिजर सार्वजनिक गरेको हो । सार्वजनिक टिजरमा श्रीमान–श्रीमतीबीचको मनमुटाव र झगडालाई देखाइएको छ। अभिनेता प्रकाश सपुत र अभिनेत्री सुहाना थापा श्रीमान–श्रीमतीको भूमिकामा देखिएका छन् । पधेँरोबाट ढिला गरी पानी लिएर घर फर्किएकी श्रीमतीमाथि श्रीमानले हात उठाउने दृश्य टिजरमा देख्न सकिन्छ ।

उक्त झगडा छुट्याउन छिमेकीको भूमिकामा रहेका सौगात मल्ल र उनकी श्रीमती पुग्दा प्रकाशले ‘अर्काको लोग्नेस्वास्नीको झगडामा नपरेकै राम्रो’ भन्ने संवाद बोल्दै नेपाली समाजको यथार्थ चित्र प्रस्तुत गरिएको छ । टिजरले ग्रामीण परिवेश, परम्परागत जीवनशैली र पहाडी पृष्ठभूमिमा हुने नेपाली समाजका यथार्थ घटनालाई उजागर गर्न खोजेको देखिन्छ। टिजरमा फिल्मका मुख्य कलाकार सुहाना थापा, प्रकाश सपुत र सौगात मल्ललाई प्रमुख रुपमा प्रस्तुत गरिएको छ।

यसअघि निर्माण टिमले नारी दिवसको अवसर पारेर नेपाली गाउँघरको मौलिकता झल्काउने पोस्टर सार्वजनिक गरेको थियो । गुरु प्रसाद मैनालीको अमर कृति ‘परालको आगो’बाट प्रेरित यस फिल्ममा सुहाना थापा, सौगात मल्ल, प्रकाश सपुत, सिर्जना अधिकारी, किशोर भण्डारी, ज्याक श्रेष्ठ, सरिता भण्डारी, रेणु न्यौपाने र बाल कलाकार मन्जिला बानियाँको अभिनय रहेको छ ।

हरिओम् सिने मेकर्स प्रा.लि.को ब्यानरमा निर्माण भएको फिल्मलाई लक्ष्मण सुनारले निर्देशन गरेका हुन्। सुशील पोखरेलको लगानी रहेको फिल्मको कथा तथा पटकथा सुशील देवकोटाले लेखेका छन् । फिल्ममा संकल्प भुजेलको छायांकन, रामजी लामिछानेको नृत्य निर्देशन, मिलन श्रेष्ठको सम्पादन र कनाल कँवरको रंग संयोजन रहेको छ। भिएफएक्स समिर मिया र सत्यम रानाले गरेका छन् भने टिजर तथा ट्रेलर सम्पादन साहिल खानले गरेका हुन् । मिक्सिङ मुकेश शाहको रहेको छ भने निर्माण संयोजन नगेन्द्र घिमिरेले सम्हालेका छन्।

फिल्मको पाश्र्व संगीत किरण तुलाधरको रहेको छ भने संगीत शान्ति ठटाल, सत्य–स्वरुप आचार्य र प्रकाश सपुतले दिएका छन्। गीतका शब्द मनबहादुर मुखिया, सुरेन्द्र राना र प्रकाश सपुतले लेखेका हुन् । यस फिल्ममा कला निर्देशन प्रतिक चौधरीले गरेका छन् भने मुख्य सहायक निर्देशकको जिम्मेवारी करण बहादुर साउदले सम्हालेका छन्। सुलभी पोखरेल र सत्यम पोखरेल सह–निर्माता रहेको फिल्मलाई नेपालभर आरआर फिल्मसले वितरण गर्दैछ। साथै डिजिटल अधिकार ओएसआरले लिएको छ ।

गुरुप्रसाद मैनालीको ‘नासो’ कथा संग्रहमा समावेश ‘परालको आगो’ कथामाथि ४५ वर्षअघि प्रताप सुब्बाले पनि फिल्म निर्माण गरेका थिए। सोही कथालाई आधुनिक सन्दर्भमा पुनःनिर्माण गरिएको निर्माता पोखरेलले बताएका छन् । फिल्म आगामी बैशाख ११ गतेदेखि देशभर प्रदर्शनमा आउने तयारीमा रहेको छ ।