रूपा वाङ्मय प्रतिष्ठान र गीतकार प्रतिष्ठानद्वारा संयुक्त रूपमा आयोजित गायन र नृत्य प्रतियोगिता ‘कास्की आइडल’को पहिलो अडिसन शनिबार सम्पन्न भएको छ । कार्यक्रमको उद्घाटन गर्दै कवि तथा गीतकार रमेश श्रेष्ठले गीतले जीवनका आरोह–अवरोहलाई चित्रण गर्ने भएकाले सबैका मन छुने माध्यम भएको बताए । उनले आफूले चित्रकला र कविता प्रतियोगितामा भाग लिएको समय स्मरण गर्दै यस्ता कार्यक्रमले नवप्रतिभालाई प्रेरणा दिने बताएका थिए ।
कार्यक्रम रूपा वाङ्मय प्रतिष्ठानका अध्यक्ष आदर्श पोखरेलको अध्यक्षतामा सम्पन्न भएको थियो । कार्यक्रममा गीतकार प्रतिष्ठानका अध्यक्ष अनुराग अधिकारीले गायन र नृत्यका नवप्रतिभा खोजीका लागि दुई संस्थाले संयुक्त रूपमा कार्यक्रम आयोजना गरेको जानकारी दिए । पोखरा क्षेत्रले नेपाली साहित्य र सङ्गीतमा पुर्याएको योगदान उल्लेख गर्दै उनले ‘कास्की आइडल’बाट उदाएका प्रतिभाहरूले यस क्षेत्रको गरिमा अझ उचो बनाउने विश्वास व्यक्त गरे ।
गायक झलक गुरुङले स्वागत मन्तव्य राख्दै कार्यक्रमको रूपरेखा प्रस्तुत गरे भने प्रतिष्ठानका सचिव मदन घिमिरेले शुभकामना मन्तव्य दिएका थिए । सो अवसरमा अनिल ढुङ्गानाले आफ्नो साङ्गीतिक प्रस्तुति दिएका थिए। उद्घाटन सत्रको सञ्चालन गीतकार प्रतिष्ठानका सचिव रुपिन्द्र प्रभावीले गरेका थिए ।
पोखरा–२७, तालचोकमा सम्पन्न अडिसनबाट गायनतर्फ २० जना र नृत्यतर्फ १५ जना दोस्रो चरणका लागि छनोट भएका छन् । छनोट भएका प्रतिभाहरूको प्रतिस्पर्धा चरणबद्ध रूपमा हुँदै फाइनलमा टप ५ चयन गरिने रूपा वाङ्मय प्रतिष्ठानका अध्यक्ष पोखरेलले जानकारी दिए । प्रतियोगिताका निर्णायकहरूमा गायनतर्फ खेम लामा र कृष्णमाया तिवारी, नृत्यतर्फ उपेन्द्र गुरुङ र समृद्धि पाण्डे रहेका थिए ।
