फिल्म जाँच पास समितिले २१ कात्तिकबाट प्रदर्शनमा आउने बहुप्रतिक्षित फिल्म ‘मन बिनाको धन’लाई ‘यूनिभर्सल’ सर्टिफिकेट दिएको छ । यो सर्टिफिकेटसँगै चलचित्रलाई सबै उमेर समूहका दर्शकहरूले हेर्न पाउनेछन् । सेन्सर बोर्डका अधिकांश कर्मचारीहरूले अशोक दर्जीको जीवनमा आधारित यो फिल्मलाई धेरै राम्रो बनेको भन्दै खुलेरै तारिफ गरेका छन् । फिल्मको उत्कृष्टतामा विश्वस्त भएका कर्मचारीहरूले यसको सफलता सँगै शुभकामना पनि दिएका छन् ।
फिल्मका निर्देशक टंक बुढाथोकीले फिल्मको ट्रेलरलाई युट्युबमा १० लाखभन्दा बढी हेरिएको र यसले आफूलाई ठूलो हौसला दिएको बताए । उनले थपे, “फिल्मको प्रचार सामग्री र ट्रेलरले दर्शकहरूलाई आकर्षित गरेको छ, जसले हामीलाई यस फिल्मको व्यापारिक सफलता सुनिश्चित गरेको विश्वास दिलाएको छ ।”
‘मन बिनाको धन’ मा मुख्य भूमिका अशोक दर्जी, सरोज खनाल, सन्तोष पन्त, नीता ढुंगाना, सम्राज्ञी थापा, भोला सापकोटा, रमा थपलिया, बुद्धि तामाङ लगायतका कलाकारहरूको अभिनय रहेको छ । यो फिल्म अशोक दर्जीको जीवनको यात्रामा आधारित छ, जसलाई टंक बुढाथोकीले जीवनमा परिवर्तन ल्याउने कथाको रूपमा प्रस्तुत गरेका छन्। अशोक हाल काठमाडौँमा कक्षा ९ मा अध्ययनरत छन् । यस फिल्मको माध्यमबाट उनले समाजका विभिन्न पाटोहरूलाई उजागर गर्दै जनताको मन जित्ने उद्देश्य राखेका छन् ।
निर्माता विष्णुमाया मैनाली, nनिर्देशक: टंक बुढाथोकी, संगीत: टंक बुढाथोकी, पटकथा र संवाद: शिवम अधिकारी, छायांकन: सौरभ लामा, कोरियोग्राफी: कविराज गहतराज, रामजी लामिछाने, सम्पादन: मित्र डी. गुरुङ, मुख्य सहायक निर्देशक: नवराज शर्मा, सह-निर्माता जी.पी संग्रोला, बिबेक नेपाल, बिजया पाण्डे र एप्पल इन्टरटेन्मेन्ट, रीच इन्टरटेन्मेन्ट, र एफडी कम्पनीले फिल्मको वितरण गर्नेछन् ।
