असोज ३१ गतेबाट प्रदर्शनमा आउने तयारीमा रहेको फिल्म ‘जेरी अन टप’ को पहिलो गीत ‘कस्तुरी’ सार्वजनिक गरिएको छ । सोमबार घटस्थापनाको अवसर पारेर सार्वजनिक गरिएको यस गीतमा फिल्मका मुख्य जोडी अनमोल केसी र आँचल शर्मालाई प्रस्तुत गरिएको छ । रोमान्टिक भाव बोकेको गीतमा अनमोल र आँचललाई मुस्ताङ र भारतको राजस्थानका मनोरम दृश्यमा प्रेमिल रुपमा देखाइएको छ ।

गीतमा आशिष गुवाजु र सदिक्षा कट्टेलको स्वर रहेको छ । गीतको शब्द, संगीत र साउन्ड डिजाइन जयन जे वाइबाले गरेका छन् भने मिक्सिङ र मास्टरिङ अशोक थानेतले गरेका हुन् । निर्माण पक्षका अनुसार, गीतले आशा, भरोसा, विश्वास र समर्पण जस्ता भावनाहरू अभिव्यक्त गर्दै फिल्मको कथा अघि बढाउन सहयोग गर्नेछ । सुयोग गुरुङको निर्देशनमा तयार भएको फिल्ममा अनमोल केसी, आँचल शर्मा, जसिता गुरुङ, केदार घिमिरे (माग्ने बुढा), भुवन केसी, उषा खड्गी लगायतको अभिनय छ ।

अभिनेत्री सुरक्षा पन्तले फिल्ममा विशेष भूमिका निर्वाह गरेकी छन् । फिल्म सरोज न्यौपानेको प्रस्तुतिमा बनेको हो। निर्माणमा न्यौपानेसँगै रोविन शेरचन, रामकृष्ण श्रेष्ठ र दीपक भण्डारीको साझेदारी रहेको छ । कार्यकारी निर्मातामा अनुराधा गिरी र ईश्वर श्रेष्ठ छन् भने नविन घिमिरे, विवेक थापा र भविष्य खड्का एसोसिएट निर्माता हुन् ।

हेमराज बिसीको कथा, विश्वास तिम्सिनाको पटकथा रहेको फिल्ममा दुलिप रेग्मीको छायांकन छ । संगीतमा जयन जे वाइबा, कालिप्रसाद बाँस्कोटा, जोहन चाम्लिङ राई र व्रिजेश श्रेष्ठ संलग्न छन् । ‘जेरी अन टप’ को टिजर यसअघि नै सार्वजनिक भइसकेको छ। अब पहिलो गीत ‘कस्तुरी’ सार्वजनिक भएपछि फिल्मप्रति दर्शकहरूको उत्साह थपिएको देखिन्छ ।