तीज नजिकिँदै गर्दा बजारमा नयाँ–नयाँ तीज गीतहरू सार्वजनिक भइरहेका छन्। यही मेसोमा लोकप्रिय गायिका सरिता भारती ले आफ्नो स्वरमा तयार भएको ‘नाच्न दे…’ बोलको नयाँ मौलिक तीज गीत सार्वजनिक गरेकी छिन् । गायिका भारतीले बिहीबार साँझ सार्वजनिक गरेको गीतको लय र शब्द दुवै आफैले रचना गरेकी हुन् । गण्डकी प्रदेशका रत्यौली भाकाबाट प्रेरित गीतलाई उनले मौलिक शैलीमा प्रस्तुत गरेकी हुन् । यो उनको दोस्रो तीज गीत हो । यसअघि पाँच वर्षअघि सार्वजनिक भएको ‘रातो सारी लरक्कै..’ बोलको गीत श्रोतामाझ लोकप्रिय बनेको थियो ।

सरिता भारतीका अनुसार, “मौलिक तीज भाकाको संरक्षण र प्रवर्द्धनका लागि मैले गण्डकी क्षेत्रबाट संकलन गरेर यो गीत ल्याएकी हुँ ।” गीतमा संगीत र संगीत संयोजन ओम सुनारको रहेको छ । ओम र सरिताको यो तेस्रो सहकार्य हो । यसअघि यी दुईले युगलमा सुदूरपश्चिमेली लोकभाका समेटिएको ‘छोड सताउन…’ गीत प्रस्तुत गरिसकेका थिए ।

‘नाच्न दे…’ गीतको रेकर्डिङ जुगल डंगोलले गरेका हुन् भने मिक्सिङ तथा मास्टरिङ नरेश बिबिसीले गरेका छन् । गीतको भिडियोमा गायिका सरिता स्वयं मुख्य भूमिकामा देखिएकी छन् । सोनी कारंजित, सृजना श्रेष्ठ, करुणा श्रेष्ठ, श्वेता श्रेष्ठ काफ्ले, निशा थापा बस्नेत, अविरा रिसाल लगायतका कलाकारहरूको अभिनय रहेको भिडियो नृत्य प्रधान बनाइएको छ ।

मच्छेगाउँको आश्रय होमस्टे मा छायांकन गरिएको गीतको छायांकन र सम्पादन राजेन्द्र पाण्डेले गरेका हुन् । कृष्ण रसालले निर्देशन र कोरियोग्राफी गरेका छन् । एसबी क्रियसनको ब्यानरमा निर्माण भएको गीतको भिडियो ‘एसबी क्रियसन नेपाल’ युट्युब च्यानलमार्फत सार्वजनिक गरिएको हो ।