गायिका एलिना चौहानले पूर्व पति विष्णु सापकोटाबाट आफूले भोगेको शारीरिक तथा मानसिक यातना सम्बन्धी तस्बिरहरू सार्वजनिक गरेकी छिन् । उनले शुक्रबार साँझ सामाजिक सञ्जाल फेसबुकमा लामो स्टाटस लेख्दै ती तस्बिरहरूसहित आफ्ना भोगाइहरू साझा गरेकी हुन् ।
एलिनाले लेखेकी छिन्, “अब म चुप लाग्दिन। यो केवल मेरो न्यायको लडाइँ होइन, यो हरेक नेपाली चेलीको आवाज हो ।” उनले आफू अब कानुनी, सामाजिक र नैतिक बाटोबाट न्यायको लागि लड्ने स्पष्ट संकेत गरेकी छिन् ।
स्टाटसमा एलिनाले भनिन्, “हामीबीचको कुरा त आपसी समझदारीमै सकिएको थियो, तर समाजको दवाव, सामाजिक सञ्जालको दुरुपयोग र सतही धारणाले फेरि मेरो व्यक्तिगत जीवनमाथि अन्याय गर्यो ।”
उनले यो लडाइँ व्यक्तिगत व्यक्ति विरुद्ध नभई, महिलालाई दोषी बनाउने सोचविरुद्धको लडाइँ भएको स्पष्ट पारेकी छन् । उनले भनेकी छिन्, “यो लडाइँ हो—त्यस मानसिकतासँग, जसले सत्य बोल्ने नारीलाई नै दोषी बनाउँछ, पीडितलाई नै कठघरामा उभ्याउँछ।”
एलिनाले आफ्नो चरित्रको बचाउ गर्न विवश भएर विगत उजागर गर्नुपरेको उल्लेख गरेकी छन् । उनले अझै पनि पुरुषप्रधान सोचले महिलाको पीडा बुझ्न नसक्ने अवस्था रहेको गुनासो गर्दै अब सत्यका पक्षमा अडिग भएर अगाडि बढ्ने बताएकी छिन् ।
उनको स्टाटस र तस्बिरहरू सार्वजनिक भएपछि सामाजिक सञ्जालमा तीव्र प्रतिक्रिया आइरहेको छ। धेरैले उनलाई साहसी कदम भन्दै समर्थन जनाएका छन् ।
