वैशाख २१ गतेदेखि प्रदर्शनमा आउने फिल्म ‘ज्याकीः आई एम ट्वान्टी वान’ का एकपछि अर्को गर्दै सार्वजनिक भैरहेका सामग्रीले दर्शकलाई सरप्राइज दिइरहेका छन् । फिल्मको फस्टलुक सार्वजनिक भएसँगै यो फिल्मप्रति दर्शकको उत्सुकता पनि ह्वात्तै बढेको थियो । टीजर तथा फस्टलुक पोष्टरपछि यो फिल्मको निर्माण पक्षले पहिलो गीत सार्वजनिक गरेको छ ।‘कथा’ बोलको गीत आईप्लेक्स मलमा रहेको वान सिनेमाज्मा  एक कार्यक्रमको आयोजना गर्दै सार्वजनिक गरियो ।

सार्वजनिक कार्यक्रममा फिल्मका मुख्य कलाकारद्वय धीरज मगर तथा जस्सीता गुरुङले गीतमा नृत्यसमेत गरेका थिए । यो गीतमा त्रिशला गुरुङ र रोहित शाक्यको स्वर, किरण थापाको शब्द, रोहित शाक्य र किरण थापाको संगीत छ ।

भिडियोमा मुख्य कलाकारद्वय धीरज र जस्सीतालाई फिचर गरिएको छ । उनीहरु गीतमा केही रोमान्टिक देखिएका छन् । यो फिल्ममा सुशन प्रजापतिको छायांकन, निमेष श्रेष्ठको सम्पादन छ ।

गीतको भिडियोलाई द वाइल्ड रिपर्ज क्रुले कोरियोग्राफी गरेको हो । सोमनाथ खनाल र रेनशा राई रानाको संवाद रहेको फिल्मलाई रेनशा राई रानाले निर्देशन गरेकी हुन् । फिल्मलाई डान्स ड्रामा भनिएको छ ।
आइकोर फिल्मस्को ब्यानरमा निर्माण भएको फिल्मका निर्मातामा प्रभु शमशेर जबरा र प्रज्ज्वल शमशेर जबरा छन् । फिल्ममा रोहितको साथमा स्वप्निल शर्मा र कालिप्रसाद बास्कोटाको संगीत छ ।

कार्यक्रममा बोल्दै अभिनेता धीरज मगरले आफ्नो लागि ‘ज्याकीः आई एम ट्वान्टी वान’ करिअरकै विशेष फिल्म भएको बताए । अभिनेत्री जस्सीता गुरुङले एउटा फिल्मका लागि तीन वर्ष समय दिएको र फिल्मको लागि गरेको मिहिनेत सम्झदा खुशी लाग्ने बताइन् ।

निर्देशक रेनशाले गाह्रो काममा नै आफूलाई हात हाल्न मन लाग्ने भन्दै ‘ज्याकीः आई एम ट्वान्टी वान’ निर्माण गर्नु चुनौतीको बिषय भएको बताइन् । तर, फिल्मको बिषयमा आफूले सधै फरक सोच्ने भएकाले डान्सको कथा जन्मिएको उनको भनाई छ ।